بسم الله الرحمن الرحيم
تحميل شرح الفرق بين كليات BIS و FMI و تجاره انجلش
الفرق بين BIS و FMI و تجاره انجلش
BIS :
كلية BIS هي أختصار ل “Business Information System” و ده برنامج تابع لكلية تجارة و أدارة أعمال جامعة حلوان و الدراسة فيه بالأنجلش
أهم حاجة بتميز البرنامج ده بأنه Mixed مابين مواد كلية حاسبات و معلومات و كلية تجارة أنجلش.
مواد ال IT هيدرسهالك نفس الدكاترة اللي بيدرسوا في حاسبات و مواد ال Business هيدرسهالك نفس الدكاترة اللي بيدرسوا في كليات التجارة. 👨🏫
هي الكلية تابعة لجامعة حلوان لكن مكانها مش في حلوان خالص مكانها في الزمالك
43 شارع أبو الفدا – الزمالك..
كلية ال BIS بتتخصص فيها من سنة أولي في شعبة نظم معلومات الأعمال و لمدة 4 سنين و بتاخد شهادة البكالوريوس في نظم معلومات الأعمال.🎓
من أهم مميزات برنامج الBIS و خصوصاً التابع لجامعة حلوان:
-نظام الدراسة Credit Hours
- اللوكيشن بتاع الكلية في الزمالك علي النيل
- تطبيق عملي باستمرار علي اللي بتدرسه عن طريق Projects و Assignments👨💻
- متاح للطلبة يقدموا في ترينينج في بنوك و شركات الأتصالات و البيزنيس
- خريج البرنامج متاح ليه مجالات مختلفة في سوق العمل متنوعة ما بين البيزنيس و ال IT
* يقدر يشتغل في البنوك و شركات البرمجيات المحلية و الأنترناشونال و مراكز المعلومات البحثية و الخدمية و الزراعية و الصناعية و الصحية و شركات البترول و الاتصالات و السياحة. الخ…
- و بيبقي مؤهل للتخصصات ديه:
* أنشاء قواعد بيانات
* إنشاء و تصميم مواقع إلكترونية
* التسويق الإلكتروني
* المحاسبة الإلكترونية المتخصصة و تخصصات تانية كتير
- الدراسة في الكلية سهلة جداً و كلها بالأنجلش و تقدر فيها تجيب تقديرات عالية و أمتياز بأقل مجهود.
FMI :
كلية FMI ديه أختصار ل ”Financial Markets & Institution” هي عبارة عن برنامج جديد تابع لكلية تجارة و أدارة أعمال جامعة حلوان و الدراسة فيه بالأنجلش .. لسة أول دفعة هتتخرج منها السنة الجاية.👨🎓
هي الكلية تابعة لجامعة حلوان لكن مكانها مش في حلوان خالص مكانها في الزمالك
43 شارع أبو الفدا – الزمالك.
بتتخصص فيها من سنة أولي في الأسواق و المنشئات المالية و بتدرس فيه كل حاجة ليها علاقة بالتمويل و الاستثمار و البورصة لمدة 4 سنين و بتاخد شهادة البكالوريوس في تخصص الأسواق و المنشئات المالية.📈
برنامج FMI مش متاح في أي جامعة حكومية أو خاصة غير جامعة حلوان .. البرنامج وصل السنة اللي فاتت لحوالي 2000 طالب متقسمين علي 3 مستويات.
السنة اللي فاتت الكلية كان تنسيقها أعلي من تجارة انجلش الشيخ زايد بسبب زيادة عدد الناس اللي قدمت عليها 🏃🏻
نظام الدراسة في البرنامج هو نظام ال Credit Hours “الساعات المعتمدة” و اللي بيتيح مرونة للطالب في اختيار عدد المواد اللي بيدرسها و الدكاترة و مواعيد المحاضرات.👨🏫
برنامج ال FMI لييه مميزات كتيرة أهمها :
1- اول تخصص من نوعه في جامعة حكومية Finance””
2- خريج البرنامج مش بيحتاج يعمل معادلات أو ياخد شهادات كتير عشان يشتغل في البورصة أو شركات تحليل الأوراق المالية.
3- بتكون مؤهل للعمل في جميع مجالات التجارة :
* شركات التأمين.
* شركات الوساطة فى الأوراق المالية.
* إدارة المحافظ المالية
* التحليل المالى والفنى
* المكاتب الاستشارية وبيوت الخبرة المتخصصة فى التمويل والاستثمار وتقييم الأصول والشركات
* الإدارات المالية لمختلف الشركات والمؤسسات الاقتصادية التجارية والخدمية والزراعية والصناعية والصحية… الى آخره.
4- الكلية دخلت مسابقة ال CFA research challenge و اللي كانت منظمة في دبي و بيتنافس فيها المحللين المالين في دول مختلفة كممثلة لجامعة حلوان و خدت المركز التاني على مستوي الشرق الأوسط.👩💻
5- الدراسة سهلة جداً و تقدر تجيب فيها أمتياز بأقل مجهود.
2ـ كلية تجارة انجلش
الكلية جزء من تجارة بس الدراسة فيها بتكون بالانجليزي
طب إيه الفرق بين تجارة وتجارة انجلش؟
– الكتب في أغلب الأحيان مش بتتألف في مصر و بتبقى متألفة في دول تانية زي بريطانيا وكندا
– اماكن الدراسة مجهزة بشكل أفضل في تجارة إنجلش عن تجارة كمان الإعداد في تجارة إنجلش بتبقى أقل ودي ميزة – الكلية بمصروفات بتختلف من جامعة لجامعه
– عشان تدخل الكلية لازم تبقى جايب درجة معينه في الانجليزي ودي بتختلف من جامعة لجامعة يعني مش حاجة ثابتة
◾الأقسام :
– أساس الكلية إن فيها 6 أقسام رئيسية بس بيختلف وجودهم من جامعة لجامعة وهما :
1- المحاسبة : أكبر قسم من حيث الأعداد
2- ادارة الاعمال : من أكتر الأقسام ال عليها إقبال بعد محاسبة
《والقسمين دول موجودين في جميع الجامعات》
3- الاحصاء والتأمين
4- الاقتصاد
《ودول بيختلف وحودهم من جامعة لجامعة》
◾نظام الدراسة:
– مدة الكلية 4 سنوات
– في أول سنتين الدراسة بتبقى عامة بمعنى إنك بتدرس مواد من كل الأقسام وكل التخصصات
– في سنة 3 بتبدء تتخصص في قسم من الأقسام وفي بعض الجامعات بيبقى التخصص من سنة 4 حسب نظام الجامعة وكمان في أقسام معينة ممكن التخصص فيها يكون من سنة 2
– التقييم أو الدرجات عموما بتبقي على 3 حاجات هما :
1- اعمال السنة
2- امتحان الميد ترم
3- امتحان نهاية الترم
وبتختلف من جامعة لجامعة لإن أوقات في جامعات بتقيم على أساس presentations بيعملها الطلبة في مواد معينة.
– خريج الكلية بيكون على علم واسع محاسبيا او في الجوانب الادارية ب《مبيعات – خدمة عملاء – تسويق – موارد بشرية – استثمار وغيرها من التخصصات المختلفة 》
هنتكلم دلوقتي عن فرص العمل للقسمين الأساسيين في الكلية وهما 《 محاسبة و إدارة أعمال 》
– محاسبة :
خريج قسم محاسبة بيبقى ليه فرص كتير في أماكن كتير زي 《البنوك وشركات المحاسبة والضرائب》 هما أكتر الأماكن احتياجا لخريجي القسم
– وأنت كطالب تجارة بتبقى محتاج شهادات تزيد من خبرتك زي 《CMA , CIA , CFA , CPA ,IFRS 》و كلهم شهادات معتمدة دولياً
– وخريج كلية تجارة وخصوصا قسم محاسبة مش بس بيشتغل في بنوك أو شركات محاسبية ،كمان يقدر يشتغل في 《المستشفيات وشركات الادوية و الشركات الخاصة》 وعموما اي استثمار لازم يبقى فيه جزء الحسابات
◾إدارة أعمال :
– خريج قسم إدارة أعمال بيبقى عنده خبره في كذا مجال منهم 《التسويق – الموارد البشرية – خدمة العملاء – الادارة وغيرهم 》
– بيبقى متاح لخريج قسم إدارة أعمال الشغل في كل الأماكن ال قولنا عليها لقسم محاسبة من شركات وبنوك ومستشفيات وغيرهم بس في positions مختلفة تتناسب مع طبيعة دراسته
زي مثلا شغله ك HR / PR / Marketeer وغيرهم
– خريج القسم بيحتاج لشهادات ودراسات تانية عشان يزود معلوماته زي مثلا شهادة MBA
منقووووول
خالص أمنياتنا بالتوفيق لجميع الطلاب ان شاء الله في جميع المراحل الدراسية انتظرو كل ماهو جديد يخص أخبار وأدوات التعليم على منصة كتاتيب مصر
