بسم الله الرحمن الرحيم
شرح تفصيلي بسيط لدرجات الرأفة في الثانوية العامة والمستفيدين منها
= درجات الرأفة بتكون خاصة بالطالب الراسب في مادة أو اتنين أو تلاتة.
= درجات الرأفة دي قانونية، يعني مش بدعة من وزارة التعليم.
= درجات الرأفة مش مفتوحة لكن ليها سقف وحد أقصى لكنها مرتبطة بالنهاية العظمى في كل مادة.
= السنة اللي فاتت الوزارة وصلت بنسبة درجات الرأفة إلى ١٠٪ من درجات كل مادة علشان تساعد بعض الطلبة إنهم ينجحوا.. لكنها مختلفة بين مادة وتانية.
= درجة الرأفة بتكون لطالب (مثلا) ناجح في كل المواد وراسب في مادة وواقف على درجتين تلاتة أربعة وينجح ممكن ياخدهم وينجح في المادة دي بحيث يتحول من راسب في مادة لناجح
في كل المواد.
= درجة الرأفة بتكون لطالب (مثلا) راسب في ٣ مواد وبكدة لازم يعيد السنة لأنه مينفعش يدخل الدور التاني إلا في مادتين فقط.. فالوزارة بتشوف أنهي مادة من المواد التلاتة محتاج فيها درجتين تلاتة أربعة فياخدهم وينجح في المادة دي بحيث يتحول من طالب لازم يعيد السنة لطالب يدخل دور تاني في مادتين.
= درجة الرأفة بتكون لطالب راسب في مادتين، وفيه مادة منهم محتاج فيها درجتين تلاتة أربعة وينجح فيها، فبياخدهم وينجح فيها ويدخل دور تاني في مادة واحدة.
= درجة الرأفة مش بياخدها طالب علشان يقفل درجات مادة معينة، أو يكون محتاج درجتين تلاتة علشان يوصل ٩٠٪ فياخد درجات رأفة توصله للتسعين في المية، الكلام ده مش بيحصل لأن دي درجات تخص طلبة بعينهم.
= درجة الرأفة ملهاش علاقة برفع نسبة النجاح، لأن ده حق للطالب بياخده عادي، طالما يستحقه بحيث تتحول حالته من راسب في مادة لناجح ومن راسب في السنة لدور تاني.
= نسبة درجات الرأفة السنادي كام؟ الله أعلم.. لكنها السنة اللي فاتت كانت ١٠٪ من درجات المادة.. يعني المادة اللي كانت من ٦٠، كان فيها درجات رأفة ٦ درجات بياخذها الطالب اللي تنطبق عليه الحالات اللي قلت عليها، والمادة اللي من ٥٠ كان ليها ٥ درجات واللي من ٢٥ ليها ٣ درجات.
= الطالب المتفوق مش بيتأثر إن فيه زميل له خد درجات رأفة وهو لأ.. لأني زي ما قلت درجة الرأفة دي بتكون للطالب اللي عايز كام درجة علشان (يتحول من راسب لناجح أو من راسب لدور تاني) مش علشان مجموعه يزيد في مادة معينة.
= لما تلاقي نفسك يوم النتيجة جايب درجة النجاح بالعافية في مادة اعرف إنك غالبا استفدت من درجات الرأفة علشان ما تبقاش راسب في المادة دي.
= هل من حق الطالب يرفض درجة الرأفة؟! أيوة من حقه يرفضها.. يعني مثلا فيه طالب راسب في ٣ مواد وبكدة لازم يعيد السنة في التلات مواد، لكن الوزارة نجحته في مادة بعد ما خد فيها درجات الرأفة بحيث يدخل دور تاني في مادتين فقط.. الطالب ده من حقه يقدم طلب في الكنترول يرفض درجات الرأفة في المادة اللي نجح فيها بحيث يعيد السنة في التلات مواد مع بعض علشان ياخذ فيهم الدرجة الفعلية مش نصف الدرجة لو دخل دور تاني في مادتين فقط.
= ده الشريح التفصيلي لدرجات الرأفة في الثانوية العامة
الصحفي الأستاذ/ أحمد حافظ
خالص أمنياتنا بالتوفيق لجميع الطلاب ان شاء الله في جميع المراحل الدراسية انتظرو كل ماهو جديد يخص أخبار وأدوات التعليم للمرحلة الثانوية على منصة كتاتيب مصر.
