بسم الله الرحمن الرحيم
تفاصيل امتحانات الثانوية العامة 2023
= أسئلة كل مادة (85% اختيار من متعدد + 15% أسئلة مقالية).. إجابة الاختيار من متعدد في (البابل شيت) وإجابة الأسئلة المقالية في ورقة بخط يد الطالب وكل سؤال مقالي هتكون إجابته من سطرين إلى 3 سطور.. وفي المواد الرياضية هيكون حل مسائل بخطواتها.
= التصحيح الإلكتروني للأسئلة المقالية هيكون كالتالي: ورقة إجابة الطالب هيتعمل لها سكانر وتدخل على جهاز كمبيوتر، وفيه اتنين معلمين متخصصين في المادة هيقعد كل واحد فيهم على جهاز – بعيد عن التاني خالص- ويصححوا السؤال (يعني فيه اتنين مصححين لكل سؤال).. لو الاتنين اتفقوا على نفس الدرجة يبقى خلاص الطالب يستحق الدرجة دي، لو الاتنين اختلفوا على الدرجة المستحقة للطالب في السؤال المقالي، هيكون فيه معلم تالت يفصل بينهم ويدي الطالب درجة السؤال.. يعني أسئلة الاختيار من متعدد والمقالي هتتصحح إلكتروني.. وكل سؤال مقالي هيعدي على 3 معلمين يصححوه.
= جميع الأسئلة هتكون من محتوى المنهج الدراسي، وهيكون فيه اختبار تدريبي للطلاب على الشكل الجديد للامتحانات بداية الفصل الدراسي الثاني، والامتحانات هتكون “أوبن بوك”، يعني هيكون فيه مجلدات مفاهيم هتتوزع على الطلاب في كل امتحان، والملجد هيبقى عبارة عن ملخص لمفاهيم كل مادة.. الطالب هيستلم المجلد في بداية الامتحان ويسلمه في نهاية الامتحان.
= اللجان اللي حصل فيها غش وشغب (وأولاد أكابر) السنة اللي فاتت، مش هيتعمل فيها امتحانات السنادي.. وهيكون فيه مراكز تصحيح إلكتروني في أكتر من محافظة، مش زي السنة اللي فاتت إن تصحيح الجمهورية كله في مكان واحد.. والأهم: كل سؤال هيكون له إجابة واحدة فقط.. فقط.. فقط.. لا إجابات متشابهة ولا غامضة.. إجابة واحدة فقط.
خالص أمنياتنا بالتوفيق لجميع الطلاب ان شاء الله في جميع المراحل الدراسية انتظرو كل ماهو جديد يخص أخبار وأدوات التعليم للمرحلة الثانوية على منصة كتاتيب مصر.
